[Squat!net]

Bron: Die Burger http://www.news24.co.za/Die_Burger

21/09/2000 22:26

Kritieke hofbevel oor Kaapse plakkers EIE KANTOOR

JOHANNESBURG. – ‘n Groep Kaapse plakkers – en daarmee saam elke plakkersgemeenskap oor die land heen – het gister ‘n belangrike oorwinning in die Konstitusionele Hof behaal deurdat die hof die Wes-Kaapse Premier beveel het om onmiddellik aan hulle ablusiegeriewe, water en waterdigte skuilings te gee.

Die plakkers – in die handel en wandel al bekend as die Irene Grootboom groep, hoewel me. Grootboom en haar gesin intussen die plakkerskamp op die Wallacedene terrein by Kraaifontein verlaat het – het in Mei mondelinge betoog in die Konstitusionele Hof gelewer waarin hulle gevra het dat hul sosiaal-ekonomiese grondwetlike reg op leefbare huisvesting geëerbiedig word.

Die staat het dié aansoek teengestaan, hoofsaaklik omdat dit ‘n presedent sal skep wat die staat (en dus die belastingbetaler) miljarde rande jaarliks gaan kos.

Die staat het in Mei nietemin ‘n onderneming aan die hof gegee dat hulle intussen na die behoeftes van die Grootboom groep sou omsien.

Twee weke gelede het die plakkers se regsverteenwoordiger, mnr. J.W. Apollos, in ‘n dringende aansoek by die Konstitusionele Hof gevra dat die Wes-Kaapse Premier en die Oostenberg munisipaliteit verplig word om hul onderneming van Mei gestand te doen en die Grootboom groep uit sy verknorsing te help.

Daar is baie kinders in dié groep en hulle is aanvanklik gedwing om ‘n perseel waar hulle geplak het en waar geriewe was, te verlaat. Hulle het hulle toe op Wallacedene gaan vestig.

Gister het die elf regters van die hof ná mondelinge betoog van adv. Jan Heunis, vir die Premier, en adv. I. Jamie, vir die plakkers, geluister.

Heunis het toegegee dat die plakkers se behoeftes aandag moet kry en sekere voorstelle oor hoe dit gedoen moet word, aan die hof voorgelê. Jamie het nie met al dié voorstelle saamgestem nie. Van die regters was ook bekommerd oor die moontlikheid dat hulle ‘n hofbevel sal maak ten opsigte van plakkers wat nie meer in die Grootboom groep is nie (soos Grootboom self).

Ná ‘n lang verdaging waartydens die regters in kamers met Heunis en Jamie gepraat het, het die regters teen vieruur ten gunste van die plakkers uitspraak gelewer. Die bevel wat uitgereik is, kom daarop neer dat twintig tydelike toilette en tien tydelike krane met lopende water voor 6 Oktober by die Grootboom groep opgerig moet word. Teen 15 Desember moet dit vervang wees deur twintig permanente toilette en twintig permanente krane.

Daarbenewens moet die Premier R200 000 beskikbaar stel om toerusting aan te koop waarmee die plakkers se skuilings waterdig gemaak moet word. Dié werk moet boonop deur die Oostenberg munisiplateit verrig word.

Dit kom daarop neer dat elke gesin in die groep sowat R760 se boutoerusting van die Wes-Kaapse regering moet kry. Dié regering moet, soos dit in die hof gestel is, ” ‘n inkopielys” opstel en aan Apollos voorlê, wat dit verder met die Oostenberg munisipaliteit moet bespreek.

Die regters het beveel dat die Wes-Kaapse regering die hofkoste van die plakkers vir gister se geding betaal. Apollos het die uitspraak as ” ‘n oorwinning vir die regte van alle haweloses in die land” beskryf.

Die Burger

bron: http://news24.co.za/Beeld/Randse_Beeld/0,1776,3-68_885783,00.html

20/07/2000 00:30 – (SA)

Polisie vat besetters se hutte, meubels Patrick Thambisa

Veiligheidsmagte het die naweek beslag gelê op die plakkershutte en meubels van hawelose inwoners van Ivory Park in Tembisa wat besluit het om erwe in Kaalfontein te beset.

Die inwoners, onder leierskap van die Vulindlela- verenigde gemeenskap van Suid-Afrika (Vucosa), het die erwe beset omdat die regering nie aan hulle alternatiewe woonplek kon verskaf nadat hulle bewys het korrupsie en bedrog is betrokke in die toekenning van woonhuise in die gebied nie.

Sommige inwoners sê hulle is al sedert 1995 op ‘n waglys, maar mense wat van Pretoria kom, het huise gekry.

Dié inwoners het gesê hulle het bewyse van mense wat tot R6 000 moes betaal voordat hulle huise kon kry.

Me. Pam Mavuso, provinsiale sekretaresse van Vucosa in Gauteng, het gesê drie polisiemanne en lede van die weermag het hulle beveel om plakkershuise te ontruim.

Inwoners het in die Lindokuhle- speelterrein vergader waar die polisie hulle weggejaag het. Mavuso beweer ‘n gestremde vrou en kind is aangerand.

Sewe leiers van die organisasie is gearresteer. Hulle het gister in die streekhof in Kempton Park verskyn.

*****************************************
Bron: http://news24.co.za/Beeld/Provinsiaal/0,1776,3-70_885664,00.html

19/07/2000 22:22 – (SA)

Dannhauser. – Sowat driehonderd plattelandse gesinne in KwaZulu- Natal dreig om ‘n plaas – waar van hul familielede se grafte geleë is – te beset.

Hulle is in 1972 van dié plaas afgesit.

Die gesinne, van die Waag Alles- gemeenskap naby Dannhauser, het opgeruk na die landdroshof in die dorpie en gedreig om die plaas te beset as daar nie dringend aandag gegee word aan hul ses jaar oue grondeis nie.

Met plakate in die lug het hulle ‘n memorandum aan amptenare by die hof oorhandig waarin hulle hul frustrasies lug oor die “slakkegang” van die herverdeling van grond.

Hulle eis dat die plaas onmiddellik aan hulle teruggegee word en het gedreig dat “enigeen wat hulle probeer keer met vuur speel”.

Eerw. Godwin Radebe, gemeenskapsleier, het gesê tydens die ontsetting het mense beeste, huise en plaasgereedskap verloor en dat hulle moeg is om te wag op hulle grond.

Die ondervoorsitter van die gemeenskap, me. Sibongile Mbatha het aangevoer dat die eienaar van die plaas, mnr. Henk Zaal, verskeie mense aangerand het toe hulle van die grafte probeer besoek het in 1998. Hy het glo ook twee families verbied om grafstene op te rig.

Zaal is verlede jaar aangekla weens aanranding met die doel om ernstig te beseer, die rig van ‘n vuurwapen en kwaadwillige saakbeskadiging, maar die saak is in die Dannhauser landdroshof voorwaardelik teruggetrek.

Zaal het ontken dat hy lede van die gemeenskap toegang tot die grafte geweier het. Hy het gesê hy is die plaas se derde eienaar sedert 1972 en was onbewus van die grandeis .

Hy het gesê die motief van die gemeenskap se oproerigheid was polities en dat die Waag Alles-gemeenskap dieselfde metodes gebruik as dié in Zimbabwe. – (African Eye News Service).

[squat!net]

bron: http://news24.co.za/Beeld/Nuus/0,1776,3-62_880855,00.html

Beeld, Johannesburg

07/07/2000

Boere in KZN ‘loop deur soos in Zim’ Dries Liebenberg

KwaDukuza. – Plaasbesettings “soortgelyk aan dié in Zimbabwe” is al jare lank in die stilligheid in Suid- Afrika aan die gebeur, het ‘n boer van die KwaZulu-Natalse noordkus gister aan die provinsie se LUR vir landbou gesê.

Mnr. Narend Singh het die gebied saam met amptenare van die depar temente van landbou en grondsake en senior polisie-offisiere besoek ná berigte eergister dat meer as sestig plase in die omgewing al vir langer as tien jaar deur duisende plakkers beset word.

Verskeie bekommerde groot bankinstellings het hom gebel om navraag te doen oor verwysings na “plaasinvalle soos in Zimbabwe”, het Singh gesê. Hy het ontken dat daar onlangse plaasinvalle was en dit bestempel as jarelange indring ing van produktiewe landbougrond.

Boere van Nonoti-Wes en Mangete in die omgewing het egter vertel van dreigemente en dat groente-oeste gesteel en suikerrietlande aan die brand gesteek word. Tientalle boere het al hul plase verlaat, terwyl ander al die afgelope vier jaar geen oes te gehad het nie.

Briewe aan presidente Nelson Mandela en Thabo Mbeki oor die jare het geen resultate opgelewer nie, het boere gesê.

Baie van die onwettige inwoners het tydens die 1994- en 1996-verkiesings weens geweld daarheen gevlug.

Boere sowel as een van die ‘sogenaamde besetters’, mnr. Lesley Sibiya, het die regering daarvan beskuldig dat hulle in die steek gelaat is.

Me. Pat Dunn van Mangete het aan Singh gesê hy maak die saak te ligtelik af as indringing. “Dit is invalle. Al die eienskappe van die voorvalle in Zimbabwe kry ‘n mens hier ook – intimidasie, brandstigting en plaasmoorde,” het sy gesê.

Meer as 5 000 werkgeleenthede het al verlore gegaan nadat bykans 70% van die 63 plase in die Mangete-omgewing sedert 1996 beset is, het Dunn gesê.

Terwyl mense van alle rasse in die omgewing boer, is daar plakkers wat sê die grond behoort histories aan swart mense. Die grondeisehof hoor die geskil eersdaags aan.

In Nonoti-Wes, waar plakkery in 1987 begin het, word 20 Indiër-boere na bewering geraak.

Beeld